Коронавирус илдетинин жайылышын алдын алуу максатында ар бир окуучунун дене табы текшерилет. Бул тууралуу бүгүн, 15-сентябрда брифингде Бишкек шаарынын мэриясынын билим берүү башкармалыгынын административдик-укуктук бөлүмүнүн башкы адиси Чынара Исакова билдирди.
Анын айтымында, бардык билим берүү мекемелеринде медициналык пункттар бар, ар бир мектепке дайындалган дарыгерлер жана медайымдар иш алып барышат.
«Кирүү чыпкалары мектептердин фойелеринде уюштурулган. Ал жерден күн сайын кезек менен окуучулардын, мектеп кызматкерлеринин абалын аныктап турушат жана көзөмөл журналына түшүрүлүп турат. Бет кап тагуу талап кылынат. Колду дезинфекциялоочу каражаттар коюлуп, бөлмөлөр желдетилип турат», — деди Исакова.
Мектептердин окуу жылына болгон даярдыгын мэриясынын атайын комиссиясы текшерип чыккан.
