«Менин шаарым» мобилдик тиркемесинин колдонуучулары эми шаарлар аралык жүргүнчү ташуу каттамдарына электрондук билеттерди онлайн режиминде брондоп жана сатып ала алышат. Бул тууралуу мэрия билдирди.
Билет сатып алуу үчүн тиркемени ачып, «Кызматтар» бөлүмүнө өтүп, тиешелүү кызматты тандоо жетиштүү. Колдонуучулар багытты, сапардын күнүн жана транспорт каражатындагы конкреттүү орунду өздөрү тандай алышат. Төлөм жүргүзүлгөндөн кийин электрондук билет тиркемеде сакталат жана аны транспортко отурганда көрсөтүү жетиштүү.
Жаңы сервис жарандардын ыңгайлуулугун жогорулатууга, билет сатып алууга кеткен убакытты үнөмдөөгө жана шаар тургундары менен коноктору үчүн санариптик кызматтарды өнүктүрүүгө багытталган.
Иштеп чыгуучулар «Менин шаарым» тиркемесиндеги жеткиликтүү электрондук кызматтардын тизмеси мындан ары да кеңейтилип турарын билдиришти.
