Парламенттин бүгүнкү жыйынында ички иштер министринин орун басары Нурбек Абдиев экстремисттик аракеттерге каршы аракеттенүү боюнча мыйзам долбоору боюнча маалымат берди.
Баяндамадан соң ал депутаттардын суроолоруна жооп берүү үчүн орун алгысы келген, бирок төрага Нурланбек Шакиев ага уруксат бербей, мындан кийин баяндамачылар трибунада жооп бериш керектигин талап кылды.
«Сиз ушул жерде туруп эле жооп бере бериңиз. Мындан кийин баяндамачылар трибунадан жооп бергенди үйрөнгүлө жана ошого өткүлө. Отуруп алган анча жарашпаган көрүнүш да. Мурдагы парламентте билесиздер премьер-министр баш болуп бардык өкмөт мүчөлөрү ушул борбордук трибунада туруп 2-3 саат туруп алып жооп беришчү. Дароо отуруп алайын дейсиңер, 5 мүнөттө бутуңар уюп кетет силердин. Үйрөнгүлө ушул жерде туруп жооп бергенге»,- деди ал.