Августтун ортосунда билим берүү мекемелери кандай форматта иштеп баштаары белгилүү болот. Бул тууралуу Билим берүү жана илим министринин орун басары Надира Жусупбекова бүгүн, 5 -августта маалымат жыйынында билдирди.
Анын айтымында, мектептердин кантип иштээри — онлайн жана оффлайн — эки факторго көз каранды болот. Ошондой эле жаңы окуу жылында мектептер кандай иштээри жок дегенде 2 жума мурун белгилүү болот.
«Бизде 120 миңге жакын педагогикалык кызматкерлер бар. 60% вакцина алышты. Эмделгендер 70% дан ашса мектептер ачылат. Дарыгерлер вакцинаны азырынча алуу мүмкүн эмес экенин айткан мугалимдер 30%ды түзүүдө. Экинчи фактор — эпидемиологиялык кырдаал. Ар бир райондук штаб, эпидемиялык кырдаалга таянып, билим берүү мекемелери кандай режимде иштээрин өзү чечет, жана үй-бүлөлөрдүн жашоосун жеңилдетүү үчүн расмий форма кийүү буйругун жокко чыгардык. Үстүнө ачык тустөгү, астына кара кийим кийүү жетиштүү», — дейт Жусупбекова.
