Президент Садыр Жапаров Чолпон-Атадагы эс алуу багынын ачылышында жергиликтүү тургундар менен жолугушууда Ысык-Көлдөгү жергиликтүү бийликтин ишине капа болгонун айтты.
“Мен маанайыңарды түшүрө турган сөздөрдү айтайын деп турам, протоколдон чыгып, кичине ээн баштык кылайын деп жатам. Парк турган жер былтыр эле таштандыларга айланган зона эле. Ушул жерди жасап коелу деп бир аз акча бөлүп паркты баштаганбыз. 6 айдын ичинде бүттүк.
Былтыр паркты жасаар алдында Чолпон-Атанын депутаттарын, акимди, мэрди чогултуп алып, жардам бергиле спорт площадкаларды салып берели, балдарга спортзалдарды салалы, 5 жылдыздуу мейманкана курам деген ички инвесторго бут тоспогула деп сурандым эле. Тилекке каршы, укпаптыр. Депутаттын аты Урмат экен, бирок өзү “урматсыз” экен. Инвестордон “Сага каршы чыгам, салдырбайм” деп 1 млн сом алыптыр. Жаштардын атынан деп дагы 10 миң доллар алышыптыр. Мейманкана эми курулганы жатат. Тилекке каршы, жасап жаткан адамды өзүбүз көрө албай бут тособуз”-деди ал.
