Президенттин жарлыгын аткарбаган чиновниктерге эскертүү берилди. Бул тууралуу президенттин маалымат катчысы Аскат Алагөзов билдирди.

«Урматтуу министрлер, президенттин облустардагы ыйгарым укуктуу өкүлдөрү, жергиликтүү бийлик өкүлдөрү!

Айрымдарыңыздар мамлекет башчы Садыр Жапаровдун жарлыгын буйтап, аны аткарбай коюунун айласын көрүп жатканыңыздар тууралуу маалыматтар бар. Кеп — үстүбүздөгү жылдын 30-январында президент Садыр Жапаров кол койгон “Мамлекеттик турак жай саясаты чөйрөсүндө Кыргыз Республикасынын жарандары үчүн турак жай менен камсыз кылуу жана турак жай куруу механизмдерин андан ары өркүндөтүү боюнча чаралар” жөнүндөгү жарлыгы тууралуу болууда. Бул жарлыкка ылайык, жер-жерлерде жер тилкелери жарандарга ипотека менен турак жай куруу үчүн Мамлекеттик ипотекалык компанияга өткөрүлүп бериш керек болчу. Бирок учурда белгиленген жерлерди ал компанияга бербөөнүн айласын издеп “бул жерлер мурда эле жеке менчикке берилип кетиптир” деген шылтоо менен документтерди жасалмалай коюп жеке жактарга өткөрүп ийүү, же өзүңөрдө калтырып калууга аракет көрүү фактылары аныкталууда.

Министрлерге, өлкөбүздүн облус жетекчилерине, райондордун акимдери жана шаарлардын мэрлерине эскертүү: Ар бириңиздер президент Садыр Жапаровдун айтылып жаткан жарлыгын бир айлык мөөнөттө аткарбасаңыздар ээлеген кызматыңардан бошотуласыздар. Ал үчүн Мамлекеттик ипотекалык компания менен байланышып, иш алып барыңыздар. Мамлекеттик ипотекалык компания өзү дагы бул багытта иш алып барууда. Бирок мында жергиликтүү бийлик өкүлдөрү өзүлөрү биринчи кезекте өз аймактарында калкты турак жай менен камсыз кылууга багытталган мамлекеттик саясатты илгерилетүүгө кызыкдар болушу кажет», — деп билдирет Алагөзов.