28-ноябрда өтө турчу парламенттик шайлоодо добуш берүү үчүн Орусиядагы кыргызстандыктарды каттоо 12-ноябрда аяктайт. Бул тууралуу Кыргызстандын Орусиядагы элчилиги билдирди.
Маалыматка ылайык, кыргыз жарандары бул күнгө чейин консулдук каттоого туруп, биометрикалык маалыматтарын тапшыруусу керек. Эгер биометрикалык маалыматтарын тапшырган жарандар болсо консулдук каттоого аралыктан, онлайн катталса болот.
Ошондорй эле Орусияда Москва, Санкт-Петербург, Сургут, Самара, Краснодар, Казан, Екатеринбург, Новосибирск, Красноярск, Тюмен, Томск, Иркутск, Хабаровск, Владивосток шаарларында, Якутияда жана Түштүк Сахалинде шайлоо участоктору иштейт.
Белгилей кетсек, 28-ноябрга белгиленген шайлоодо парламентке саясий партиялар аркылуу 54 депутат, ал эми бир мандаттуу округдардан 36 депутат шайланышы керек.