Россиянын агартуу министри Сергей Кравцов Президент Садыр Жапаровго эл аралык “Артек” балдар борборуна республикалык балдар үчүн 150 орундук сертификат-жолдомосун тапшырды. Бул тууралуу президенттин аппаратынын басма сөз кызматы билдирди.
Ошондой эле, билим берүү багытында тажрыйба алмашууну күчөтүү максатында Кыргызстандын мектептерине орус мугалимдерин тартуу программасын кеңейтүүгө даяр экендигин билдирди. Бүгүнкү күндө 29 орус мугалими Ош шаарындагы мектептерде иштеп жатышат.
Мындан тышкары, Сергей Кравцов Кыргызстандын айыл жерлеринде мугалимдердин тажрыйба алмашуусуна кызыкдар экенин жана анын маанисин белгиледи.
Президент Садыр Жапаров эки министрликтин билим берүү жаатындагы тыгыз кызматташтыгы мындан ары да улантыларына үмүт артарын айтып, Россиянын Президенти Владимир Путинге өлкөнүн билим берүү системасын колдогону үчүн ыраазычылыгын билдирди.