Садыр Жапаровдун жана Камчыбек Ташиевдин жакындарынын кармалышы боюнча президенттин маалымат катчысы Аскат Алагөзов төмөндөгүлөрдү билдирди:
“Бир нече маалымат сайттары Президент Садыр Жапаровдун жана МинКаб Төрагасынын орун басары – УКМК Төрагасы Камчыбек Ташиевдин жакындары кылмышка шектелип кармалганын өздүк булактарына шилтеме кылып кабарлашты.
Алардын мыйзамсыз аракеттерге баруусу боюнча компетенттүү органдар расмий маалымат беришет.
Сиздердин көңүлүңүздөрдү дагы бир жолу өлкөбүздүн жогорку бийлиги мыйзамсыз аракетке баргандарды калкалабай тургандыгына бургум келет.
Президент Садыр Жапаров мыйзамсыз аракетке баргандар ким болбосун иштеп жаткан мыйзамдардын чегинде ээлеген кызматына, социалдык статусуна карабай жооп бериши керек деген айныгыс позицияны карманат”,-деди ал.
Бүгүн Садыр Жапаровдун иниси жана Камчыбек Ташиевдин бажасы кармалды деген маалыматтар тараган.
