Бүгүн, 7-майда Жогорку Кеңештин төрагасы Нурланбек Шакиев Жалал-Абад облусунун Сузак районунда унаа сүзүп кеткен балдардан кабар алды.
Шакиев алардын ар бири менен баарлашып, карап жаткан жакындары менен да сүйлөштү.
“Келечек ээлеринин саламаттыгы баарынан кымбат. Андыктан, балдардын катышуусундагы иш чараларды өткөрүүдө алардын коопсуздугуна өзгөчө көңүл бурулушу керек. Көңүл кош жасалган мамиленин кесепети оор болорун Сузактагы окуя анык көрсөттү”, – деди төрага.
Андан тышкары, жабыркаган ар бир бала дарыгерлердин тыкыр көзөмөлүндө болуп, бардык тиешелүү медициналык жардамдар берилиши керектигин айткан Нурланбек Шакиев жасалып жаткан иштер боюнча оорукананын башкы дарыгери Акылбек Мамановдон маалымат алды.
Шакиев төраганын резервдик фондунан да каржылык жардам көрсөтүлөрүн билдирди.
Азыркы тапта Сузак районунда унаа сүзүп кеткен балдардын ону Бишкек шаардык клиникалык тез жардам ооруканасында дарыланууда.
