Жайыл районунун Суусамыр өрөөнүндө кезектеги экологиялык рейд өткөрүлдү. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, текшерүүнүн жүрүшүндө экологиялык мыйзамдарды бузган бир нече учур катталган. Анын ичинде балык уулоонун эрежелерин бузган жарандарга карата Укук бузуулар жөнүндө кодекстин негизинде эки протокол түзүлгөн. Мындан тышкары, жаратылышка олуттуу зыян келтирген синтетикалык тор менен балык кармоо фактысы боюнча дагы бир протокол толтурулуп, күнөөлүүлөргө айып пул салынган.
Рейддин жүрүшүндө инспекторлор жергиликтүү тургундарга жана малчыларга жайыттарды коргоо боюнча түшүндүрүү иштерин жүргүзүштү. Анда жайыттын кыртышын сактоо максатында чөптөрдү автоунаа, трактор, мотоцикл жана башка транспорт каражаттары менен тебелөөгө катуу чектөө киргизилгени эскертилди.
