Жогорку Кеңештин төрагасы Нурланбек Шакиев депутаттардын июль айында чет өлкөгө чыгуусуна чектөө киргизилерин эскертти. Мындай чара эл өкүлдөрүнүн каникулга чыгуусуна бир ай калгандыгына жана жумуштун көптүгүнө байланыштуу экенин айтты.
«Парламенттин жайкы каникулга тарашына толук бир ай убакыт калды. Ошол бир ай убакыт ичинде үзүрлүү, натыйжалуу иштеп берүүңүздөрдү чакырат элем. Себеби, өлкөнүн келечегине байланышкан маанилүү мыйзамдар бар. Андыктан, бир ай бою өзүңүздөрдүн милдеттериңиздерди так аткарып берсеңиздер. Ошону менен катар чет өлкөлүк иш сапарлардын баарына чектөө болот, ага таарынбаңыздар. Эки-үч депутаттан көп сапарлар болбойт. Ошон үчүн сапарларды сиздер дагы, биз дагы чектейбиз»,- деди төрага.
