Жалал-Абад облусунда Бангладештин 11 жараны чек арадан мыйзамсыз өткөн учурда кармалды. Бул тууралуу УКМК билдирет.
Алар 8-июнда Өзбекстанга иштөө үчүн барышкан, бирок жумуш таппай Кыргызстандын аймагына өтүүнү чечкен. Бангладештин жарандары менен мыйзамсыз миграциялык канал уюштурган Кыргызстандын жараны Н.А.И. да кармалды. Учурда мыйзамсыз миграциялык каналды уюштурууга тиешеси бар башка адамдарды аныктоо боюнча иликтөө иштери жүргүзүлүүдө.
Эскерте кетсек, 21-майда Базар-Коргон шаарында жана Сейдикум айылында Бангладештин 46 жараны кармалган. Алар миграциялык мыйзамдын талаптарын эске албай, өлкө аймагында мыйзамсыз эмгектенишкен.
Кармалган чет элдиктерге карата административдик протоколдор түзүлүп, сот органдары аларды Кыргызстандын аймагынан чыгаруу маселесин кароодо.
