Бүгүн, 17-май Жогорку Кеңеш Кумтөр боюнча атайын мамлекеттик комиссиянын “Кумтөр Голд” ишканасына убактылуу тышкы башкаруу киргизүү сунушун жактырды. Түзүлгөн жагымсыз кырдаал эске алынып, Министрлер кабинетине «Кумтөр Голд» компаниясына убактылуу тышкы башкарууну киргизүү жана тышкы башкаруучуну дайындоо сунушу берилди.
Токтомдо Мамлекеттик комиссиянын “Кумтөр” алтын кенинин ишмердүүлүгүн иликтөө жыйынтыгы эске алынып, комиссиянын иштөө мөөнөтү дагы 3 айга узартылды.
Эске салсак, Жогорку Кеӊеш 2021-жылдын 17-февралында “Кумтөр” алтын кенинин ишмердүүлүгүн текшерүү боюнча убактылуу депутаттык комиссия түзгөн, андан кийин ал мамлекеттик комиссия болуп кайра түзүлгөн. Кенден жылына болжол менен 15-18 тонна алтын өндүрүлөт. «Центерра Голд» компаниясынын Директорлор кеӊешинин курамы 11 адамдан турса, кыргыз тараптан 3 гана өкүл болгон.