Жумгалда айылдашынын 9 баш малын уурдаган шектүү кармалды. Бул тууралуу Нарын ОИББнин басма сөз кызматы билдирди.
Маалыматка ылайык, 28-апрель күнү Жумгал райондук милициясына мал уурулук боюнча арыз келип түшкөн. Анда 30-март күнү саат 01:00дөр чамасында Жумгал районунун Чаек айылынын 59 жаштагы К.К. аттуу тургунунун 9 баш (кой, козу, эчки) малы уурдалганы жазылган.
Аталган факты каттоого алынып, сотко чейинки өндүрүш иши ачылган. Тергөө амалдары жүргүзүлө башталган. Ыкчам иликтөө иштеринин жүрүшүндө мурда сот жообуна тартылган Жумгал районунун Чаек айылынын 33 жаштагы А.Т. аттуу тургуну шектүү катары кармалган.
«Учурда шектүүнүн башка дагы кылмыштарга катыштыгын боюнча тергөө амалдары жүргүзүлүп жатат. Шектүү убактылуу кармоочу жайына камакка алынды». — деп жазылат маалыматта.