Өлкө башчы Садыр Жапаров АКШнын президенти Джо Байденге Американын Кентукки жана коңшу штаттарындагы куюндан улам адамдардын курман болгондугуна байланыштуу көңүл айтты. Бул тууралуу президенттин аппаратынын басма сөз кызматы билдирди.
“Кентукки жана коңшу штаттарындагы куюндан адамдардын курман болгонун жана кыйроолор тууралуу суук кабарды кайгыруу менен кабыл алдым. Ушул жаратылыш кырсыгынан улам курман болгондордун туугандарына жана жакындарына көңүл айтуу менен жабыркагандардын тез сакайып кетишин каалайм”, — деп айтылат Мамлекет башчысынын телеграммасында.
Белгилей кетсек, кечээ, 12-декабрда АКШнын чыгыш тарабын, анын ичинде Иллинойс, Миссури, Арканзас, Кентукки жана Теннесси штаттарын бороон каптаган. Жаратылыш кырсыгы Кентуккиде 100 кишинин өмүрүн алган, ошондой эле Теннессиде үч жана Иллинойсто алты адам каза тапты. ЖМКлардын жазышынча, Иллинойстогу Amazon компаниясынын кампасында кишилер иштеп жатканда куюн учуруп кеткен.
