Ржев шаарында бүгүн, 7-майда, Россия Федерациясына жасаган расмий сапарынын алкагында президент Садыр Жапаров Советтик жоокердин Ржев мемориалы эстелигине гүлчамбар койду. Бул тууралуу президенттин басма сөз кызматы билдирди.
Садыр Жапаров жана Россиянын мамлекеттик Думасынын Федералдык жыйынынын Төрагасы Вячеслав Володин Советтик жоокердин 25 метрлик уникалдуу скульптурасынын алдына гүл коюшуп, 1942–1943-жылдары Улуу Ата Мекендик согуштун жылдарында Ржев алдындагы салгылашууларда курман болгон жоокерлердин элесин бир мүнөт унчукпай туруу менен эскеришти.
Бул Улуу Ата Мекендик согуштун эң узак салгылашууларынын бири – Ржев салгылашынын эстелиги экени белгиленет.
Мемориалдык комплекс Тверь облусунун Ржев районундагы Хорошево айылында тургузулган. Советтик жоокердин 25 метрлик монументи абада каалгып, турналардын тобунда кайып болуп бараткандай элес калтырат. Эстеликтин жанында курман болгон жоокерлердин ысымдары жазылган дубалдар бар. Ал Улуу Ата Мекендик согуштун ардагерлеринин демилгеси менен коомдук кайрымдуулуктан түшкөн каражатка курулган. Мемориалдык комплекс 2020-жылдын 30-июнунда ачылган.
Андан соң Садыр Жапаров менен Вячеслав Володин Улуу Ата Мекендик согуштун Борбордук музейинин Ржев салгылашына арналган филиалында болушуп, алар үчүн кыска экскурсия өткөрүлдү.
