Сокулукта 25 жаштагы эркек кишини ур-токмокко алып, тоноп кетишкен шектүүлөр кармалды. Бул тууралуу Чүй ОИИБден билдиришти.
Маалыматка ылайык, ушул жылдын 28-август күнү Сокулук райондук милициясына 1995-жылы туулган К.М. аттуу жаран денесиндеги жаракаттар менен Бишкек шаарындагы Улуттук хирургия борборуна түшкөндүгү тууралуу маалымат келген.
Белгисиз эки адам түн ичинде жабырлануучуну унаага салып Сокулук районунун Күн-Туу айылына алып барып, денесине залал келтирип, акча каражатын алып качып кетишкен.
Аталган окуя КЖКнын 207-беренесинин (каракчылык) негизинде кылмыш иши козголуп, натыйжада кылмышка шектелип 1991-жылы туулган М.Д. жана 1992-жылы туулган К.М. аттуу жарандар кармалган.
Шектүүлөр убактылуу кармоочу жайына киргизилип, тергөө уланууда.