Ысык-Көл районунун аймагында парашют аттракционунун ишмердүүлүгүнө тыюу салынды. Бул тууралуу жыйында жаратылыш ресурстары, экология жана техникалык көзөмөл министринин орун басары Асел Раимкулова билдирди.
Мындай чечим эс алуучулардын коопсуздугун камсыз кылуу максатында кабыл алынган.
«Туристтик сезондо Ысык-Көлдүн аймагында суу аттракциондорунун ишмердүүлүгүнө тыюу салууга кырсыктар көп катталып, анын кесепетинен эс алуучулардын арасында адам өмүрлөрү кыйылган учурлар себеп болууда», — деди министрдин орун басары.
Ошондой эле коомчулукта скутерлерден чыккан күйүүчү жана майлоочу майдын калдыктары көлдүн суусуна аралашып, көлдүн экологиясына терс таасирин тийгизүүдө деген пикирлер айтылып келет.
